Donald Trump Oítȟaŋčhaŋ Ič’íčhuwa na Óta Líla Iníhiŋčiyapi

Peter Hill lé owá

Pȟeží Tȟó Wí iákeyamni, 2016

TȞUŊKÁŠILA OTHÍ — Phuté Wókič’u Wóokhuwa Okȟólakičhiye kiŋ Donald Trump kaȟníǧapi kte séča čha anúŋkȟataŋhaŋ óta iyúš’iŋyayapi. Šúŋšuŋla Wóokhuwa Okȟólakičhiye él ópȟapi kiŋ óta ȟča waȟtélapišni, na Phuté Wókič’u óta tȟa-ókȟolakičhiye kiŋ iháŋgwičhakhiyiŋ kta ikȟópȟapi.

Wičháša núm héčhena kičhí akíčhiyapi kiŋ henáuŋs Ted Cruz é na John Kasich épi. Cruz tȟa wóiyukčaŋ ečhíyataŋhaŋ líla išláyataŋhaŋ nážiŋ. Waníkiya Wowičala ogná wasúya čhíŋ, na wakítaŋtaŋke. Kasich íŋš čhokátake s’e nážiŋ éyaš wówapi iyóȟpeyapi líla čónala iglámna na ohíya okíhi šni načhéče.

Čhaŋkhé Trump é na Cruz épi čha oíhaŋke iyágleya akíčhiyapi kte s’eléčheča. Čhaŋpȟásapa Wí kiŋháŋ Phuté Wókič’u Okȟólakičhiye kiŋ omníčiye tȟáŋka gluhápi kte, na hétu čha tuwé waŋžíla kaȟníǧapi kte héčha. Éyaš líla wóakhiniče tȟáŋka kte s’eléčheča. Na tuktógna wakáȟniǧapi k’éyaš líla óta iyókiphipi kte šni, na okȟólakičhiye kiŋ khináksa okíhi.

Tákuwe Trump líla óta waȟtélapišni kiŋ hé: líla wóoyusiŋke yuhá máni, na tóna tȟa wóiyukčaŋ kiŋ héčhetulapi šni kiŋ hená ošúŋgye wičhákhuwa, na wíŋyaŋ kiŋ wičháyuonihaŋ šni ečháŋl éš waȟtéwičhalašni na šna wičháyašiče, na agná Muslims hená wóanapte awíčhakaǧa čhíŋ, na Spayóla Makȟóčhe oíčaǧo ektá thihépiya háŋska waŋ káǧiŋ kte ȟčiŋ kéye. Éš’eš tókhel okíhika wawíwaȟtelašni na wókȟokpȟekpȟeya waéye, čha itȟáŋčhaŋ yaŋkíŋ kta ikíphi šni yeló.

Šúŋšuŋla Okȟólakičhiye ečhíyataŋhaŋ, Hillary Clinton é na Bernie Sanders naháŋȟči khiíŋyaŋkapi. Clinton héčhena ohíya áye, éyaš Sanders leháŋl ohítiya kȟaphíŋ kte ȟčiŋ škíŋčiye. Clinton ohíye háŋtaŋš, ótȟokaheya wíŋyaŋ itȟáŋčhaŋ yaŋkíŋ kte. Na Lakȟótiya “Tȟuŋkášilayapi” uŋkékiyapi kte šni, éyaš tókhel čhažéuŋyatapi kta iyéčheča kiŋ tȟaŋíŋ šni, “Uŋčíyapi” naíŋš tókhel uŋkékiyapi kta héči. Čha wóiyukčaŋ luhápi héči uŋkókiyaka po!