Lakȟóta Oyáte na Owáyawa Waŋkátuya kiŋ Ramah Mázaska Kȟoktášiča Tóna Yuháwičhakhiyapi Kte

 

John Yellowbird Steele (Oglála Lakȟóta Oyáte Itȟáŋčhaŋ kiŋ) lé owá

Ištáwičhayazaŋ Wí ičínuŋpa, 2016

 

TȞUŊKÁŠILA OTHÍ –– Hékta okó uŋ héhaŋ, New Mexico wayásu wičháša waŋkátuya waŋ James Parker ečíyapi čha wóyasu káǧiŋ na Ikčé Oyáte kiŋ iwíčhakiyiŋ na ptáyečaska Lakȟóta Wóawaŋyaŋka Okȟólakičhiye (BIA eyápi kiŋ hé) iyáuŋpapi ečhíyataŋhaŋ $940 million iwíčhakičazo na héktakiya wičhákičayežu kte héčha kiŋ hé yusúta. Hé uŋ ečhíyataŋhaŋ, Ikčé Oyáte opáwiŋǧe šakówiŋ kiníl mázaska kiŋ lé iyówažapi na ečhánike s’e LWO kiŋ wičhákikpamni kte.
 

Wayásu wičháša Parker heyé, “Oyáte tóna lé owážapi kiŋ hená tȟéhaŋ uŋ líla iyótiyekiyapi. Mázaska eyá iwíčhakičazo kiŋ gluhápi šni čha héčhetu khéš tuktéktetaŋhaŋ theȟíya mázaska olótapi."

 

Parker iyúkčaŋ ektá mázaska ikíkčupi kte kiŋ lé kítaŋȟčiŋ wičhákičiyuotkuŋziŋ kte. Heyé, “$940 million wičhákičhupi kiŋ lé héčhetu, na iyénakeča yeló. Mázaska kiŋ lená tȟéhaŋ naókpanipi, na agná mázaska óta wayásu wóečhuŋ kiŋ lé aglúsotapi. Líla óta lé owážapi, na líla tȟéhaŋ lé iwíčhakičazo," eyé.

 

Parker isáŋm leyé, “Tóhaŋni New Mexico makȟópašpe kiŋ lé mázaska lenákeča wayásu wóečhuŋ uŋ kažúžu šni. Takómni wačhíŋksabya uŋkpámnipi kta waŋ héčha,” eyé.

 

Wayásu wóečhuŋ kiŋ lé waníyetu wikčémna núŋpa sáŋm záptaŋ heháŋyaŋ íŋyaŋke. Wákhiya wičháša yámni oyáte kiŋ iwíčhakiyapi na wičhákičiyuečhetupi: Lloyd Miller é naháŋ Mike Gross é naháŋ Bryant Rogers. Oyáte kiŋ ohíyapi čha líla iwíčhakičiyuškiŋpi.

 

Uŋkéyapi kiŋ Ikčé Oyáte opáwiŋǧe šakówiŋ kiníl mázaska kiŋ lé iyówažapi, na iyúha lél čhažéwičhuŋyatapi uŋkókihipi šni, éyaš tóna lél itȟáŋokšaŋ úŋpi kiŋ čhažéyal owíčhuŋwapi kte:

 

Oglála Lakȟóta Oyáte: $12,836,771

Oglála Lakȟóta Čhaŋksáyuha Okȟólakičhiye: $11,986,780

Wakpá Wašté Oyáte: $6,882,051

Sičháŋǧu Lakȟóta Oyáte: $5,340,025

Íŋyaŋ Woslál Háŋ Oyáŋke: $4,250,296

Siŋté Glešká Owáyawa Waŋkátuya: $1,167,054

Khúl Wičháša Oyáte: $1,166,112

Oglála Lakȟóta Makȟóčhe Awáŋyaŋka Okȟólakičhiye: $653,361

Oglála Lakȟóta Owáyawa Waŋkátuya: $637,915

Tȟatȟáŋka Íyotaka Owáyawa Waŋkátuya: $361,374

Sičháŋǧu Wakȟáŋyeža na Thiwáhe Wawókiye: $40,014

 

 

Lakȟóta Wí Wótȟaŋiŋ Wówapi lé uŋúŋkhiyapi

www.nsweekly.com/news/2016-03-02/More_News/Millions_in_Ramah_funds_earmarked_for_OST_and_OLC.html